ភ្នំពេញ៖ ឯកអគ្គរដ្ឋទូតអាមេរិកប្រចាំកម្ពុជា លោក W. Patrick Murphy បានផ្ញើសារលិខិតជូននាយករដ្ឋមន្ត្រីកម្ពុជា សម្តេចតេជោ ហ៊ុន សែន ចំពោះមរណភាព លោកព្រឹទ្ធាចារ្យ ហ៊ុន ណេង ដែលបានទទួលមរណភាពកាលពីថ្ងៃទី៥ ខែឧសភា ឆ្នាំ២០២២ ដោយសារជំងឺបេះដូង។
ក្នុងលិខិតផ្ញើជូនសម្ដេចតេជោ ឯកអគ្គរដ្ឋទូតអាមេរិកលើកឡើងថា៖ «ខ្ញុំមានការក្រៀមក្រំយ៉ាងខ្លាំង ដោយបានដឹងអំពីមរណភាពនៃបងប្រុសរបស់សម្តេច ឯកឧត្តម ហ៊ុន ណេង ប្រធានគណៈកម្មការទី៤ នៃរដ្ឋសភា កាលពីថ្ងៃទី៥ ខែឧសភា ឆ្នាំ២០២២។ ក្នុងនាមសា្ថនឯកអគ្គរដ្ឋទូតសហរដ្ឋអាមេរិកប្រចាំកម្ពុជា ខ្ញុំសូមសម្តែងនូវសមានចិត្តយ៉ាងជ្រាលជ្រៅបំផុត និងការចូលរួមរំលែកទុក្ខដោយស្មោះ ជូនចំពោះសម្ដេច និងក្រុមគ្រួសារចំពោះការបាត់បង់ដ៏ធំធេងនេះ»។
គួរឱ្យដឹងផងដែរថា បងប្រុសរបស់សម្ដេចតេជោ គឺលោក ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារជំងឺគាំងបេះដូង។ បច្ចុប្បន្នសពរបស់លោក ហ៊ុន ណេង ត្រូវបានក្រុមគ្រួសារដាក់តម្កល់នៅគេហដ្ឋានក្នុងខេត្តកំពង់ចាម មុននឹងដង្ហែរទៅបញ្ចុះនៅវត្តសុវណ្ណគិរីរតនៈភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាមនៅថ្ងៃទី៩ ខែឧសភា ខាងមុខ៕
